Pangzawl Pastor Bial Inkhawmpui leh kei

                 Pangzawl Pastor Bial Inkhawmpui vawi 45-na chu Khawngbawk kohhran-ah ni 11. Octber zan atanga neih a ni a, He inkhawmpui-ah hian Rev Lalthangliana Hnamte, Co-Ordinator, Pastoral Ministry chu speaker niin, 'Thiltihtheihna-a thuam' tih thupuia hman  a ni.

 

              Inkhawmpui tan a nih hian khua a chhe hle mai a, vengchungah phei chuan motor tlan chhoh chi rual a ni lo. hetiang boruak renga kan awm chuan, khawmpui nuam lo tak a ni dawn a nih hi tiin kan ngaihtuah hman a ni.

            Zai kan hruai :

            Zirtawp zan chu zai hruai tura ruat kan ni a, Zai hruai tura thlan te hi - U Faka, Mapuia, Siama, Mami,La-i leh kei kan ni a,Lalpa'n kan tawngtaina min chhan sakin hlimtakin zai kan hruai thei a,Haleluiah Amen! pêin Lalpa kan fak a,a nuam hle a ni. Hemi zan-ah hian Zaipawl pawhin 'kan zalen hun'tih hla kan rem bawk a ni.

        Ka tawlhthlu : 

                Sawi tawh ang khan, ruah lah chu inkhawm kan kal thlengin a la tla reng mai si a,Bazar bul peng atanga kal a ngai tlat mai a, haw lam-ah phei chuan kawng a nal si a, ka báwr deuh bawk nên ka tlu ta zawt mai a lawm le! Ka berh chiuang khawp mai. Tlangval lai a ni ang tih a hlawuhawm khawp mai.

        Rawngbawlna Pawimawh ka kovah!

                       Mihring finna-a teh a, engmah nilo, mihring pumraw tehna-a vantlang pawh phak lo, zahawmna reng nei lo leh, hnehna nei lo thleng pawha pawm duh-a, a rawngbawl phal tu, Lalpa chu fakin awm rawh se!

        TKP Pangzawl Pastor Bial Rorelna-ah chuan rawngbawlna pawimawh tak mai ka kovah dah a ni tlat mai. Lalpa rawngbawl hi ka duhsam ber  a ni a, mahse, hetiang ang rawngbawlna chelh tur erawh hi chuan phu lo ka inti in, tling lo ka inti hle. Bial TKP Asst Secretary hna chelh turin Lalpa'n min dah vê hi ka lâwm a, a rawngbâwlna hna chelh tûr erawh hi chuan amah bawk ka hmahruaitu tûr a nih avângin ka lâwm a ni. Lalpa, ka lâwm e.

       Zaipawl Sakramen leh Pathian zan inkhawmna-ah:

       Mite angin thiamin, hnehsawh em em ni lo mah ila Lalpa hnen atanga ka dawn Solfa thiamna ka nei hi ka lâwmna tizualtu a ni thin. Sakramen inkhawm Pathianni chhuna neih-ah   'Tláng mawi tak chu a awm' tih hla kan rem a, Zân-ah 'Chawimawina Hla' kan sa a, patian min kaihhruaina changa zaipawl  rawngbawlna kan nei thei hi ka lawm hle mai.Lalpa chu fakin awm rawh se!

       Thalai Aw lâwmman Agent hnênah sem a ni:

        Lalpa hnena lawmthu ka sawi tawp lohna tur chu, thiamna min pe a, Thalai Aw tha taka enkawl thei tura, thiamna mai piah lamah, hriselna, ngaihtuahna dik, rilru thianghlim, rinawmna, taimakna, inpêkna min neih tir a, thawhpui tha tak (a bikin Chhana) min pe hi a ni. Pathianni zân inkhawm-ah Thalai Aw Agent mi 21 hnênah, sex leh ingngaihzâwnna chungchánga Christian dating lehkhabu "'Tiam tlat e' i tih hmain' tih lehkhabu, Dina Chawngthu ziah kan sem a, an hlâwk pui ngêi kan beisei tlat a ni.

         Thunawi:

         Tun tum inkhawmpui chu Lalpa'n ropuina changin, Fakna boruak a nuam thin hle mai a lawmawm takzet  a ni. bcm Khawngbawk pawh an inbuatsaihna a tha-in, an Biakin pawh an sa mawi khawp mai a, a nuamin a hahdam thlak hle a ni. Khaw chhia pawh zia chhovin, tluang takin inrinni chhun atang chuan boruak duhawm tak-ah hun kan hmang thei a, Lalpa chu fakin awm rawh se.