Mipa Naupang Enkawl Dan

 

Fa ro ro-ah pawh mipa fa chu an tha a tho zak mai a, an rawl a ring a, an chet lak dan a bawraw a. Chutiang naupang chu mi tha, mi khawngaih thei, mize tha tak nei tura chhuah chu chona lian tak a ni. Tun tumah hian Mipa naupang kan enkawlna kawnga kan tih tur leh tih loh tur te kan en ho dawn a ni.

 

1 Pian atanga Kum 4 :

Hemi hunlai hian Mipa Naupang chu A nu naute a ni bik ngawih ngawih a ni.

A nu tanpuina leh thawhpuina a zawng char char thin.

A nu chuan Hmangaihna leh Duhsakna-in a enkawl ngei ngei tur a ni.

Fapa thinlung-ah a nu leh pa ten an hmangaih a ni tih a intuh tur a ni.

 

2 Kum 5 – 14 Inkar :

    • Mipa naupang chuan mipa tak tak nun an zir chho tan a, a pa chu a tan chuan engkim-a engkim niin, a entawn ber a ni.

    • A pa ngaihsakna dawn dan tur a zawng char char a, naupang thenkhat phei chuan an pa awmloh avangin an damlo hial thei a ni.

    • A pa a ngaih hun lai leh a atchilh bur lai pawh nise, hetih hun lai hian a nu pawhin a a fapa tan a awm a ni tih a lan tir reng tur a ni.

 

3 Kum 14 – a chunglam

    • Hetih hun lai hian naupang chuan a chhungte piah lamah midang-ah a rilru a dah thin.

    • Nu leh pa te pawhin kar kan siam thiam ve hlek a ngai a, mahse eng ang mi nge a kawm a, engtianginnge a chet tih thlithlai reng tur a ni.

Fuihna tha a dawn loh chuan naupang chu thiante bulah che tlain, an chetzia ang ang a la mai thin a ni.

Kan tih tur te :

1. An chet dan phung thlithlai reng tur

Mipa fa chuan toys-ah pawh silai, fei,phaw tih lam te games-ah pawh contact games leh cops and robbers,zombie tih lam te an tuipui thin. Nu leh pa te hian heng ang tharum thawhna anga kan ngaih hi an ni tan chuan an khawvel chhanhim an zir ve na a ni. Hetiang games hian mahni inrintawkna leh thian siam thiamna te a tuh thei tlat a ni. Hman zanah,ka fapa pawhin Dionosaur Killing games a khel a, ‘Apa, kha min lo kah sak te an tam si,a hring kha chu kap suh aw! Ka thian a nih kha’ a tia,ka han khelh sak chuan, dinosaur hring chuan kawng a lo hruai a, a sen tam zet hian min lo dang hi a lo ni a, a hring kha lo seh an tum a, chhanchhuah kha ka hna a ni. Ka han khelh khan naupang ngaihtuah tawkah chuan an skill kawng hrang hrang a tihhmasawn ka ring. 

Amaherawhchu,kan enpui ngai erawh chu, eng ang games nge an khelh, an chet dan a bawraw em tih te thlithlai pui tur a ni. Pawisawi lo chunga an chet dan a bawraw chuan khawngaihna leh fair taka thiltih a pawimawhna te zirtir an ngai tihna a ni dawn a ni.

He thil ka sawi hian, zalen taka games khelh tir lam ni lovin, nu leh pa te hian fate hun bi kan siam sak a pawimawh hle bawk a ni.

2. Ninawm i tih khawpin che se la, inbuan rawh se!

Mipafa chu an harh a, an chet dan a physical hle thin. An zuang a, an lawn a, an lum a,an let a, hei hian motor skill a ti hmasawn a, chet dan an zir a ni. Ninawm i tih em em lai khan an tan chuan a hrisel em em thung a ni. An thiante nen pawh Han inbeiin,han inchai rawh se, chu chuan inlaichinna tha a siam thin a, a chang chuan an tah chang a awm ang a, an khem chang pawh a awm ang. Mahse, heng ang kan khap tlat a nih chuan an zir tur tam tak kan chhuhsak dawn tih hriat tur a ni.

3. Nungchang tha neih zirtir tur a ni.

Naupang chakna leh thahrui ti chhuak thei lek loa, up hlum ngawt lo , a tha leh dik zawnga khalh hi thil pawimawh tak a ni. Naupang harh vang leh tha za thunun tum chu a harsain, i dawhtheihna tlintawk a thleng fo ang, mahse thinnel leh zaidam taka awm a pawimawh hle. Na taka naupang hrem hian a nakin hunah naupang chu mi bumro takah a chhuah thei tih zir chhuah a ni. An thiltih that avangin fak la, an awmdan mawi avangin i lawmna hrilh thin ang che. An tuina zawng nia i hriat chu tuipui la, a zawhna che chhangin nangpawhin a thil tih chungchangah zawhna zawt ve thin ang che.

4. Ngilneihna leh Khawngaihna zirtir

Leilung danah mipa chet duh dan chu a rum thin. Hei hi mipa mipatna dik a ni. hemi avang hian zirtirna tha an mamawh hle. Mihring chu mahni-a khawsa thei lo kan nihna leh midangte nena inmamawh tawn kan nihna zirtir a, ngilneihna leh khawngaihna an nuna lan tir thei tura kan buatsaih a pawimawh a, an toys thiante khalh tir te, ranvulh chunga ngilneihna lan tir te mawl te atanga kan zirtir te hian ngilneihna leh khawngaihna an rilru-ah a tuh thei a ni.

5. Bal,hnawk leh bengchheng ngaihtheih.

Fa i nei a nih chuan,in a hnawk ang a, kawr bal a tam ang a, bengchheng nen. Heng hi i khap bur a nih chuan mipa fa active leh tha tak neih inbeisei theih a ni lo hial ang. Bal, hnawk chu a fai leh mai a, bengchheng pawh a kiang ve mai a,khami avanga i fapa-in hlimna a hmuh zo zai kha a leia lei rual a ni lo asin. A pawilo chinah chuan i fapa chu thlah zalen la, chirh khawih se, Balu te chu a tripper lemah chuan a JcB chuan lo chhung rawh se. An thahrui hmanralna tur thil ti theia an awm avangin lawm em em zawk tur a ni.

Tih loh tur lam ve le!

1. Thunun lutuk tum loh tur

Mipa naupang chu a tiha tih ngei atanga inzir an ni. An tawn hriat atangin an zir thin. Chutiang a nih avang chuan i thusawi pawh an ngaihthlak loh chang a awm fo ang. An chet dan sawhkhawk let atanga an thil zir hi sawia hrilh ai chuan a fiah zawk a ni. Kawng bumboh deuhah a tluksual i hlauh avanga cycle khalh i phal loh ringawt ai chuan han tlu ngei se, a tan chuan a thatlohna kha a chiang zual a ni. Nu leh pa chuan a awm tawk leh hlauhawm chin kan hre vek ang, vengthawng leh hlauthawng reng renga awm hi naupang development tithuanawm thei a ni tih hriat a tha hle.

2. Inchhung sekrek tihna kawnga awl tir

Inchhung sekrek thil a phak ang tawk khawih tir pawh hi nu leh pa tam tak chuan kan awl tir deuh thin. Amaherawhchu,mawhphurhna tha tak hlen zirtirna tur chuan an theih ang tawk,inchhung sekrek thil khawih tir hi thilpawimawh tak a ni a, nu mal nih phei chuan tih tir ngei ngei tur a ni. 

3. Tah chu a men lo em mai 

Fapa te an chesual a, ‘tap suh,tah chu a men lo em mai’ kan tih hi a dik lo a ni. Tah hi kan emotion kan lan chhuah tir dan a ni a, a tah a chhuah chuan tah mai kha a tan a hrisel zawk a ni.

4. Mipa chuan hlauh an nei ngai lo tih hrilh

Naupangte-a huaisenna dik tak tuh tur chuan tu mai pawh hian hlauhna an neih vek thu leh chu chu thil nih dan zawk a nih thu an hriatthiam a ngai a ni. Huaisenna chu hlauhna thlauhthla-a tihtur tih ngam hi a ni tih hriattir tur a ni. Hlauh neih loh hrim hrim zirtirna chuan naupang mizia chu a tha lo zawngin a hruai daih thei zawk a ni.

Hetah hian Youtube video a en thei e